काभ्रे  । काभ्रेपलाञ्चोकको बनेपास्थित काभ्रे आईटिएफ तेक्वान्दो प्रतिष्ठानमा नियमित प्रशिक्षणरत खेलाडीहरूलाई रङ्गीन पेटी वितरण गरिएको छ । प्रतिष्ठानले गत शनिबार सञ्चालन गरेको रङ्गीन पेटी अपग्रेड परीक्षामा सफल भएका खेलाडीहरूलाई आईतवार मण्डनदेउपुर नगरपालिका प्रमुख टोकबहादुर वाईबाको प्रमुख आतिथ्यतामा आयोजित कार्यक्रममा पेटी वितरण गरिएको हो ।कार्यक्रममा बोल्दै नगर प्रमुख वाईबाले खेलकुदले अनुशासित, स्वस्थ र आत्मविश्वासी नागरिक निर्माण गर्ने भएकाले अध्ययनसँगै खेलकुद क्षेत्रमा पनि निरन्तर लाग्न खेलाडीहरूलाई आग्रह गरे । खेलकुदमार्फत स्थापित भएका छोराछोरीले अभिभावकलाई सन्तुष्टि दिनुका साथै राष्ट्रका लागि समेत योगदान पु¥याउन सक्ने उनको भनाइ थियो ।
काभ्रे आईटिएफ तेक्वान्दो प्रतिष्ठानले नियमित प्रशिक्षणमा रहेका खेलाडीहरूलाई विभिन्न कार्यक्रममार्फत खेलकुदमा निरन्तर लाग्न उत्प्रेरित गर्दै आएको उल्लेख गर्दै नगर प्रमुख वाईबाले नगरपालिकाको तर्फबाट आवश्यक सहयोग गर्ने प्रतिबद्धता व्यक्त गरे । उनले मण्डनदेउपुर नगरपालिकामा नगरपालिकाको आयोजनामा खेलकुद कभर्ड हल निर्माण भइरहेको जानकारी दिँदै त्यसको उद्घाटनका अवसरमा राष्ट्रियस्तरको सम्भव नभए प्रदेशस्तरीय प्रतियोगिता आयोजना गरेर सञ्चालनमा ल्याउने बताए ।कार्यक्रममा सामाजिक व्यक्तित्व तथा काभ्रे जिल्ला खेलकुद विकास समितिका पूर्वअध्यक्ष रघुबर चौप्रधानले आफूले स्थापनाकालदेखि नै आईटिएफ तेक्वान्दो खेलको विकासमा सकेको सहयोग गर्दै आएको र आगामी दिनमा पनि सहयोगलाई निरन्तरता दिने बताए ।
अर्का अतिथि तथा खेलाडी सौरभ कायस्थले खेलकुदले कमजोर व्यक्तिलाई बलवान र अनुशासनहीन व्यक्तिलाई सज्जन बनाउन महत्वपूर्ण भूमिका खेल्ने बताए । खेलाडी, अभिभावक र डोजाङबीचको समन्वयबाट मात्रै राम्रो खेलाडी उत्पादन गर्न सकिने उल्लेख गर्दै उनले खेलाडीहरूलाई ‘म गर्न सक्छु’ भन्ने आत्मविश्वासका साथ खेलजीवनलाई निरन्तरता दिन आग्रह गरे ।काभ्रे आईटिएफ तेक्वान्दो प्रतिष्ठानका अध्यक्ष तथा नेपाल आईटिएफ तेक्वान्दो राष्ट्रिय रेफ्री प्रमुख राजमन्दिर श्रेष्ठले काभ्रे आईटिएफले राष्ट्रियस्तरमा उदयमान खेलाडी उत्पादन गर्दै आएको बताए । फाइट, प्याट्रन र ग्रुप प्याट्रनलगायतका प्रतिस्पर्धामा काभ्रे आईटिएफका खेलाडीहरूले उत्कृष्ट प्रदर्शन गर्दै आएको उनले उल्लेख गरे ।कार्यक्रममा परीक्षामा सफल भएका खेलाडीहरूलाई पहेंलो पेटीदेखि रातो–कालो पेटीसम्म वितरण गरिएको थियो । जसअनुसार विभिन्न रङ्गिन पेटीतर्फका ११० जना जना खेलाडीलाई वितरण गरिएको प्रतिष्ठानले जनाएको छ ।
प्रतिष्ठानका अध्यक्ष, काभ्रे तेक्वान्दो आईटिएफ संघका संस्थापक तथा नेपाल आईटिएफ तेक्वान्दो राष्ट्रिय रेफ्री प्रमुख राजमन्दिर श्रेष्ठको अध्यक्षतामा कार्यक्रम सम्पन्न भएको थियो ।