काभ्रे । जिल्लाको रोशी गाउँपालिकाले बृद्धबृद्धा अभिभावकहरूको उचित हेरचाह तथा पालनपोषण गर्ने सन्तानलाई ‘श्रवण कुमार पुरस्कार’ प्रदान गरेको छ ।

गाउँपालिकाका १२ वटै वडाबाट छनोट भएका उत्कृष्ट २४ जना सन्तानलाई जनही पाँच हजार रुपैयाँ नगदसहित सम्मानपत्र सहित  सम्मान प्रदान गरिएको हो । 

पछिल्लो समयमा बृद्धबृद्धा अभिभावकको बिचल्ली गर्नेहरूको संख्या बृद्धि हुदै गएको अवस्थामा गाउँपालिकाले त्यस्तो व्यवहार न्युनिकरण गर्न पुरस्कारको स्थापना गरेका थिए । 

रोशी गाउँपालिकाको १२ वटा वडाको ज्येष्ठ नागरिकको उत्कृष्ट पालनपोषण गर्ने दुई-दुई जना सन्तान वा परिवारका सदस्यहरूलाई उनीहरूको कर्तव्य परायणताको कदर गर्दै सम्मानित गरिएको थियो । गाउँपालिकाले वडा नं १ बाट लक्ष्मी मायाँ तामाङ र दिक्षा सिलवाल, वडा नं. २ बाट अमृत लामा र हरी बहादुर थापा,  वडा नं. ३ बाट यशोदा थापा क्षेत्री र सिता कुमारी आले थापा मगर, वडा नं. ४ बाट तिर्थ कुमारी जिमी र काहिला लामा, वडा नं. ५ बाट पवा सिद्धि लामा र फूलमायाँ तामाङ र वडा नं.  ६ बाट अरुणा मैनाली र माइली मायाँ तामाङ सम्मानित भएका छन् । त्यस्तै वडा नं. ७ बाट नवराज दुलाल र राम प्यारी श्रेष्ठ, वडा नं. ८  बाट खड्ग बहादुर शाही र जमुना तामाङ, वडा नं. ९ बाट गोमा लुंगेली मगर र अर्जुन शाही, वडा नं. १० बाट चेत बहादुर लामा र छेगुदोर्जे तामाङ, वडा नं. ११ बाट सुर्य बहादुर तामाङ र मिन बहादुर सिदाली मगर र वडा नं. १२ बाट सेतु मायाँ वाइवा र राजकुमार मगर सम्मानित भएका छन् ।

समाजमा अहिले नैतिकता र आदर्श व्यक्तिहरू थोरै र स्वार्थी व्यक्तिहरू धेरै रहेकोले आफ्नो अभिभावकलाई हेरचाह र पालनपोषण गर्ने सन्तानलाई सम्मान गरेको रोशी गाउँपालिका अध्यक्ष दिनेश लामाले बताए । नैतिक र आदर्श समाज निर्माणमा यसले थोरै भएपनि सकारात्मक भूमिका खेल्नेमा उनको जोड थियो ।

गाउँपालिका उपाध्यक्ष मिमबहादुर वाइबाले आफ्नो बुढेसकालमा बृद्धबृद्धा अभिभावकलाई अलपत्र पार्ने अवस्था आउन नदिन राम्रो पालनपोषण गर्ने सन्तानलाई सम्मान गरेको बताए । 

गाउँपालिकाका प्रवक्ता वसन्तकुमार स्याङ्तानले आफ्नो अभिभावक भन्दा ठुलो मार्गदर्शक अरु हुनै नसक्ने बताए । बा-आमाको पिडा आफु बा-आमा भएपछि मात्र बुझ्ने उनको भनाई छ । जीवनभर आफ्नो सन्तानलाई दिएका अभिभावक बुढेसकालमा हेलामा बस्नु नपरोस् भन्ने हेतुले सम्मान गरेको उनले बताए ।