कटुञ्जेबेशी । रोशी खोलाले बगाउँदा एक वृद्धको मृत्यु भएको छ । मृत्यु हुनेमा रोशी गाउँपालिका–७ कटुञ्जेबेँसी निवासी करिब ७५ वर्षीय मोतिमान पाख्रिन रहेका छन् ।
जिल्ला प्रहरी कार्यालय काभ्रेपलाञ्चोकका अनुसार सोमबार दिउँसो रोशी गाउँपालिका–७ स्थित रोशी भिलेज नजिकबाट रोशी खोला तर्ने क्रममा पाख्रिन बगेका थिए । स्थानीयबाट खोलाले मानिस बगाएको सूचना प्राप्त हुनासाथ प्रहरी चौकी कटुञ्जेबेँसी र इलाका प्रहरी कार्यालय मंगलटारबाट खटिएको प्रहरी टोलीले खोजी तथा उद्धार कार्य थालेको थियो ।
खोजीका क्रममा पाख्रिनलाई रोशी गाउँपालिका–८ गिम्दीबेँसीस्थित रोशी खोलाको किनारमा मृत अवस्थामा फेला पारिएको प्रहरीले जनाएको छ ।
घटनाको कानुनी प्रक्रिया पूरा गर्न जिल्ला प्रहरी कार्यालय काभ्रेपलाञ्चोकबाट थप प्रहरी टोली घटनास्थल पुगेको छ । आवश्यक अनुसन्धान तथा मुचुल्का प्रक्रिया सम्पन्न भएपछि शव पोस्टमार्टमका लागि धुलिखेल अस्पताल ल्याईने जिल्ला प्रहरी कार्यालय काभ्रेपलाञ्चोकले जनाएको छ ।