परिवर्तनका लागि उठेका मेरा आवाजलाई
तिमी विद्रोहको संज्ञा दिन्छौ भने,
आफूलाई क्रान्तिकारी हुँ भन्दै हिँड्छौ भने—

याद गर, साथी,
म त्यो इतिहास हुँ
जसले समयका हरेक घाउलाई आफ्नै रगतले लेखेको छ।
म त्यो ज्वाला हुँ
जसले अन्यायको अँध्यारो चिर्न विद्रोहको आगो बोकेको छ।

मलाई निष्ठाको पाठ नपढाऊ, साथी।
मेरो निष्ठा किताबका अक्षरले होइन,
मेरो रगतले प्रमाणित गरेको सत्य हो।
मेरो संस्कारले मलाई सिकाएको छ—
सत्यबाट विचलित हुनु हार हो,
र अन्यायसँग सम्झौता गर्नु मृत्यु।

म शङ्कामा होइन, विश्वासमा बाँच्न जान्दछु।
तर विश्वासघातको सामु
मेरो मौनता पनि विद्रोह बन्छ।

अन्योलको भीडमा हराएर बाँच्नुभन्दा,
सत्यको बाटोमा एक्लै उभिनु
मेरो स्वाभिमान हो।

सायद तिमीले नचिनेको मेरो परिचय यही हो, साथी—
म खुला आकाशको पन्छी हुँ।
मेरा पखेटा कसैको अनुमतिले होइन,
मेरो आत्मसम्मानले फैलिएका हुन्।

म स्वतन्त्र जन्मिएको हुँ,
स्वतन्त्र नै बाँच्नेछु।
किनकि मेरा लागि
स्वतन्त्रताको एक सास
हजारौँ दासताका जीवनभन्दा महान् छ।

पेरिस , फ्रान्स