पनौती । धुलिखेलस्थित राधाकृष्ण बिस्कुट इन्डस्ट्रिजले सामाजिक उत्तरदायित्व अन्तर्गत प्राणनाथ माइती वृद्धाश्रम र मानव सेवा मानव कल्याण सेवा बाल आश्रमलाई बिस्कुट सहयोग गरेको छ।

राधाकृष्ण बिस्कुट इन्डस्ट्रिजले पनौती नगरपालिका–७ स्थित प्राणनाथ माइती वृद्धाश्रममा आश्रित असहाय तथा अशक्त वृद्धवृद्धाका लागि करिब २० हजार बराबरको बिस्कुट उपलब्ध गराएको हो। त्यसैगरी, मानव सेवा मानव कल्याण सेवा बाल आश्रममा आश्रित बालबालिकाका लागि करिब १७ हजार बराबरको बिस्कुट सहयोग गरिएको छ।

राधाकृष्ण बिस्कुट इन्डस्ट्रिजका म्यानेजर जीवन बस्नेतले दुवै संस्थामा पुगेर सहयोग सामग्री हस्तान्तरण गरेका थिए। उनको पहलमा धुलिखेल–५ स्थित राधाकृष्ण बिस्कुट इन्डस्ट्रिजले उपलब्ध गराएको बिस्कुट एक कार्यक्रमका बीच वृद्धाश्रममा आश्रित वृद्धवृद्धा तथा बाल आश्रममा रहेका बालबालिकालाई वितरण गरिएको हो।

इन्डस्ट्रिजका प्रोप्राइटर दिलिप श्रेष्ठले साउनको वर्षायाममा आश्रित वृद्धवृद्धा र बालबालिकालाई पौष्टिक आहारका रूपमा राहतस्वरूप सहयोग गरिएको बताए। उनले आगामी दिनमा पनि यस्ता सामाजिक कार्यलाई निरन्तरता दिने प्रतिबद्धता व्यक्त गरे।

म्यानेजर बस्नेतले समाजका असहाय नागरिकलाई सहयोग गर्न पाउँदा आफूलाई खुसी लागेको बताउँदै भविष्यमा पनि यस्ता मानवीय कार्यमा निरन्तर साथ रहने बताए।

हाल प्राणनाथ माइती वृद्धाश्रममा देशका विभिन्न स्थानबाट आएका ४६ जना वृद्धवृद्धा आश्रित रहेका छन् भने मानव सेवा मानव कल्याण सेवा बाल आश्रममा ३६ जना बालबालिका आश्रित रहेका छन्।